La storia
Nc'è cu dici chi la storia
è maestra di la vita,
chi ndi juta la memoria
si ndi piaci la partita.
Nc'è cu cerca vanagloria
E si ddhicca li so dita.
Basta mi ndi la mparamu
Studiandu chianu chianu.
Si la storia non sapimu
Comu ciechi caminamu,
sempri nta la merda simu,
puru quando in aeroplanu
pe lu mundu ndi ndi jmu
e parramu lu talianu.
Capiscisti cumparuzzu
Chi ti mmucci comu struzzu?
E la storia chi ti dici
Si tu ti la vo' mparari?
Chi lu poveru e nfelici
Cuntra u riccu avi a lottari,
ca lu riccu mai lu dici
ma ndi voli macellari,
poi ndi faci a nui saddizzi
cusì vidi si la mbizzi.
Si la mbizzi la to' storia
E si no si scunchiudutu
Mentri vai cercandu gloria
Ti lu fannu lu tambutu.
Ti dannu la mangiatoria
pasta sciutta e statti mutu.
Risbigghiamundi figghioli
Cu li denti e cu li moli.
Cu li denti muzzicamu
Sti gran figghi di buttana,
chi ndi dinnu «aundi jamu,
senza Bush e senza Obama?»
Cu li moli masticamu
No la gumma mericana
Pani e ogghiu a la grandi
Senza spendi e senza spandi.
Nc'è cu dici ca finiu,
Ca no rriva cchiù Baffoni
Nenti caristii e calìu
Senza cchiù comunistoni.
Dragu e Renzi lu Mimìu
Viva Letta e Berlusconi.
Tutti nsemi supra a sella,
quant'è bellu Mattarella.
Tutti chisti ànnu la brama
mi ti fùttinu, cozzali!
O chi bellu panorama,
senza ogghiu e senza sali.
Manca sulu Fukujama,
chi finiru beni e mali,
e nc'è puru facebuccu
tu nduvina aund'è lu truccu.
E lu truccu, o vera gloria,
lu diciva zu Gnazìnu,
è lu mundu senza storia,
quantu sangu senza vinu!
E la seggia cacatoria
si rivela porcuspinu.
Zu Gnazìnu lu Buttitta,
Mi la levu la birritta.
Cumpagnu non t'avviliri,
semina all'acqua e a lu ventu,
scippa spini a non finiri,
caddh'e mani e si cuntentu,
cercu e non ti sacciu diri
quandu finisci u lamentu.
Paci sempri e mai la guerra
Cuntr'e guai di la terra.